തടഞ്ഞുവച്ച വേതനം നൽകാൻ തീരുമാനം

തിരുവനന്തപുരം: കെ -ടെറ്റിന് സമാനമായ ഉയർന്ന യോഗ്യതകളുള്ള (സെറ്റ്, നെറ്റ്, എം.എഡ്, എം.ഫിൽ, പി.എച്ച്.ഡി) അദ്ധ്യാപകർക്ക് 2025 ഒക്‌ടോബർ 31 വരെ കുടിശികയുള്ള ദിവസവേതനം നൽകും. നിശ്ചിത കെ-ടെറ്റ് യോഗ്യതയില്ല എന്ന കാരണത്താൽ തടഞ്ഞുവച്ച വേതനം, ഓരോ കേസും പ്രത്യേകം പരിശോധിച്ച് നൽകുന്നതിന് അനുമതി നൽകി.

അദ്ധ്യാപകരുടെ കെ- ടെറ്റ് യോഗ്യതയുമായി ബന്ധപ്പെട്ട് നിലനിന്നിരുന്ന തർക്കങ്ങളിൽ വ്യക്തത വരുത്തിക്കൊണ്ട് പൊതുവിദ്യാഭ്യാസ വകുപ്പ് ഉത്തരവ് പുറപ്പെടുവിച്ചു. കെ -ടെറ്റ് കാറ്റഗറി III വിജയിച്ച അദ്ധ്യാപകർക്ക് ഇനി മുതൽ കെ-ടെറ്റ് കാറ്റഗറി II നേടുന്നതിൽ നിന്നും ഒഴിവാക്കി നൽകി. സുപ്രീംകോടതിയിൽ സർക്കാർ സമർപ്പിച്ചിട്ടുള്ള റിവ്യൂ പെറ്റീഷനിലെ അന്തിമ തീരുമാനത്തിന് വിധേയമായിരിക്കും ഇ‍ൗ നിർദേശങ്ങൾ. അദ്ധ്യാപകരുടെ സേവന വേതന വ്യവസ്ഥകൾ മെച്ചപ്പെടുത്തുന്നതിന് സർക്കാർ പ്രതിജ്ഞാബദ്ധമാണെന്ന്‌ മന്ത്രി വി ശിവൻകുട്ടി വാർത്താസമ്മേളനത്തിൽ പറഞ്ഞു.