വനിതാ ട്വന്റി-20 ലോകകപ്പ്: നെതർലൻഡ്സിനെ തകർത്ത് പാകിസ്ഥാൻ വനിതകൾക്ക് വിജയത്തോടെ മടക്കം

ബ്രിസ്റ്റോൾ: വനിതാ ട്വന്റി-20 ക്രിക്കറ്റ് ലോകകപ്പിൽ അരങ്ങേറ്റം കുറിച്ച നെതർലൻഡ്‌സിനെ 37 റൺസിന് പരാജയപ്പെടുത്തി പാകിസ്ഥാൻ. കളിച്ച നാല് മത്സരങ്ങളും തോറ്റ പാകിസ്ഥാൻ വനിതകൾ അയിഷ സഫർ, ക്യാപ്ടൻ ഫാത്തിമ സന, ഓപ്പണർ ഗുൽ ഫിറോസ എന്നിവരുടെ മികവിലാണ് ടൂർണമെന്റിലെ തങ്ങളുടെ ആദ്യ വിജയം സ്വന്തമാക്കിയത്.

മത്സരത്തിൽ ടോസ് നേടി ബാറ്റിംഗിനിറങ്ങിയ പാക് വനിതകൾ തുടക്കത്തിൽ പതറിയെങ്കിലും നിശ്ചിത 20 ഓവറിൽ ആറ് വിക്കറ്റ് നഷ്ടത്തിൽ 126 റൺസെന്ന ഭേദപ്പെട്ട സ്‌കോർ പടുത്തുയർത്തി. 12 റൺസെടുത്ത മുനീബ അലി നേരത്തെ പുറത്തായെങ്കിലും, 63 റൺസ് നേടി ഓപ്പണർ ഗുൽ ഫിറോസയും 32 റൺസെടുത്ത അയിഷ സഫറും ചേർന്ന് പാകിസ്ഥാനെ മത്സരത്തിലേക്ക് തിരികെ കൊണ്ടുവന്നു. രണ്ടാം വിക്കറ്റിൽ ഇരുവരും ചേർത്ത 94 റൺസിന്റെ കൂട്ടുകെട്ടാണ് പാക് വനിതകളുടെ അടിത്തറ.

ഡച്ചുകാരുടെ ബൗളിംഗ് പിഴവുകളെ കൃത്യമായി മുതലെടുത്തായിരുന്നു ഫിറോസയുടെ ബാറ്റിംഗ്. മറുഭാഗത്ത് അയിഷ മികച്ച പിന്തുണ നൽകി. അവസാന ഓവറുകളിൽ ഏഴ് റൺസുമായി പുറത്താകാതെ നിന്ന തൂബ ഹസൻ പാക് സ്‌കോർ 120 കടത്തി. 127 റൺസ് വിജയലക്ഷ്യവുമായി മറുപടി ബാറ്റിംഗിനിറങ്ങിയ നെതർലൻഡ്‌സ് മികച്ച തുടക്കമാണ് നടത്തിയത്. 24 റൺസെടുത്ത ഹെതർ സീഗേഴ്‌സും 30 റൺസോടെ ബാബെറ്റ് ഡി ലീഡെയും ഡച്ച് നിരയ്ക്ക് പ്രതീക്ഷ നൽകിയെങ്കിലും പാക് വനിതകളുടെ ബൗളിംഗ് ആക്രമണത്തിന് മുന്നിൽ ഡച്ച് വനിതകൾ അടിപതറി.

ബാറ്റിംഗിന് പിന്നാലെ ബൗളിംഗിലും അയിഷ സഫർ ടീമിന് രക്ഷകയായി. മൂന്ന് വിക്കറ്റുകളും ഒരു റണ്ണൗട്ടുമായി അയിഷ ഡച്ച് നിരയുടെ നടുവൊടിച്ചു. ക്യാപ്ടൻ ഫാത്തിമ സനയും മൂന്ന് വിക്കറ്റ് വീഴ്ത്തി തിളങ്ങി. ഡയാന ബെയ്‌ഗ്, നഷ്ര സന്ധു എന്നിവർ പിന്തുണ നൽകിയതോടെ വലിയ കൂട്ടുകെട്ടുകളുണ്ടാക്കാൻ നെതർലൻഡ്‌സിന് സാധിച്ചില്ല. ഒടുവിൽ 18 ഓവറിൽ 89 റൺസിന് നെതർലൻഡ്‌സ് ഇന്നിംഗ്‌സ് അവസാനിക്കുകയായിരുന്നു.