ഒറാങ്കൂട്ടാൻ ജന്മനാട്ടിലേക്ക്

മുംബയ്: മഹാരാഷ്ട്രയിലെ താനെയിൽ വന്യജീവി കടത്തുകാരിൽ നിന്ന് രക്ഷപ്പെടുത്തിയ ഒറാങ്കൂട്ടാനെ ഇന്തോനേഷ്യയിലേക്ക് തിരിച്ചയച്ചു. മൂന്ന് വയസ് പ്രായമുള്ള ആൺ ഒറാങ്കൂട്ടാനെയാണ് അഹമ്മദാബാദിൽ നിന്നും പ്രത്യേക വിമാനത്തിൽ ഇന്തോനേഷ്യയിലേക്ക് തിരിച്ചയച്ചത്. ഇതാദ്യമായാണ് ഇന്ത്യയിൽ നിന്നും രക്ഷപ്പെടുത്തുന്ന ഒരു വന്യമൃ​ഗത്തെ സ്വന്തം ജന്മനാട്ടിൽ എത്തിക്കുന്നത്.

താനെ ഫോറസ്റ്റ് ഡിവിഷന്റെ പരിശോധനയിൽ ഡോംബിവിലിയിലെ ഒരു കെട്ടിടത്തിൽ നിന്നാണ് ഒറാങ്കൂട്ടാനെ കണ്ടെത്തിയത്. കൂട്ടിലടച്ചനിലയിൽ കണ്ടെത്തിയ ഒറാങ്കൂട്ടാനെ നാ​ഗ്പൂരിലെ സുവോളജിക്കൽ പാർക്കിലേക്കാണ് ആദ്യം അയച്ചത്. പിന്നീട് സുപ്രീംകോടതിയുടെ പ്രത്യേക ഉത്തരവ് പ്രകാരം ​ഗുജറാത്തിലെ സ്വകാര്യ വന്യജീവി സംരക്ഷണകേന്ദ്രമായ വൻതാരയിലേക്ക് മാറ്റി. തുടർന്ന് ഇവിടെയാണ് ഒറാങ്കൂട്ടാനെ പരിചരിച്ച് വന്നിരുന്നത്. ഇന്തോനേഷ്യയിലെത്തിച്ച ഒറാങ്കൂട്ടാനെ താത്കാലിക ക്വാറന്റീന് ശേഷം വടക്കൻ സുമാത്രയിലെ കേന്ദ്രത്തിലേക്ക് മാറ്റും.