ഉപഗ്രഹങ്ങൾ വരുന്നതിന് മുമ്പ് ഭൂപടം തയാറാക്കിയത് ഇങ്ങനെ,​ ലോകത്തെ ഞെട്ടിച്ച ദൗത്യത്തിന് പിന്നിൽ പ്രവർത്തിച്ചത് ഇന്ത്യക്കാരൻ

ന്യൂഡൽഹി: പത്തൊൻപതാം നൂറ്റാണ്ടിൽ വിദേശികൾക്ക് പ്രവേശനം കർശനമായി നിയന്ത്രിച്ചിരുന്ന ടിബറ്റിന്റെ ഭൂപ്രദേശം രഹസ്യമായി അളന്ന് രേഖപ്പെടുത്തിയ ഇന്ത്യൻ സർവേയറാണ് നൈൻ സിംഗ് റാവത്ത്. ഉപഗ്രഹങ്ങളും അത്യാധുനിക സാങ്കേതികവിദ്യകളും ഉപയോഗിച്ച് ഭൂമിയുടെ ഓരോ കോണും നിമിഷങ്ങൾക്കുള്ളിൽ രേഖപ്പെടുത്തുന്ന ഇന്നത്തെ കാലത്ത്, സ്വന്തം കാലടികളെ അളവുകോലാക്കി, കൈയിലെ ജപമാലയും പ്രാർത്ഥനാ ചക്രവും രഹസ്യ ഉപകരണങ്ങളാക്കിയാണ് ഒരു വലിയ ഭൂപ്രദേശത്തെ ലോക ഭൂപടത്തിലേക്ക് നൈൻ സിംഗ് റാവത്ത് ചേർത്തത്.

മലയോര ഗ്രാമത്തിൽ നിന്ന് രഹസ്യ ദൗത്യത്തിലേക്ക്

1830ൽ ഇന്നത്തെ ഉത്തരാഖണ്ഡിലെ കുമാവോൺ ഹിമാലയ മേഖലയിലെ മിലം ഗ്രാമത്തിലാണ് നൈൻ സിംഗ് റാവത്ത് ജനിച്ചത്. അക്കാലത്ത് ടിബറ്റിലേക്ക് പ്രവേശിക്കുന്ന യൂറോപ്യൻ യാത്രക്കാർക്ക് തടവോ വധശിക്ഷയോ വരെ നേരിടേണ്ടിവന്നിരുന്നു. ഇതോടെ ടിബറ്റിന്റെ ഭൂപ്രദേശം രേഖപ്പെടുത്താൻ ബ്രിട്ടീഷ് ഭരണകൂടം പുതിയ മാർഗം തേടി. പ്രദേശത്തെ ഭാഷയും സംസ്‌കാരവും അറിയുന്ന മലയോര സ്വദേശികളെ പരിശീലിപ്പിച്ച് രഹസ്യമായി സർവേ നടത്തിക്കുകയായിരുന്നു പദ്ധതി. ഈ ദൗത്യത്തിൽ ഏറ്റവും ശ്രദ്ധേയനായ വ്യക്തിയായി റാവത്ത് മാറി. പിന്നീട് സർവേ ഓഫ് ഇന്ത്യ അദ്ദേഹത്തെ 'പണ്ഡിറ്റ് നമ്പർ വൺ' എന്നാണ് വിശേഷിപ്പിച്ചത്.

അളവുകോലാക്കിയത് ശരീരം

റാവത്തിന്റെ യാത്രകളിലെ ഏറ്റവും സവിശേഷമായ ഭാഗം രഹസ്യമായി അദ്ദേഹം അളവെടുപ്പ് നടത്തിയ രീതികളായിരുന്നു. ഓരോ ചുവടും ഒരേ നീളത്തിൽ വയ്ക്കാൻ അദ്ദേഹം പ്രത്യേക പരിശീലനം നേടിയിരുന്നു. ഒരു കിലോമീറ്റർ 2,000 ചുവടുകൾ എന്ന നിലയിലായിരുന്നു കണക്കുകൂട്ടൽ. ചുവടുകൾ എണ്ണുന്നതിനായി ബുദ്ധമത ജപമാലയിൽ ഉണ്ടായിരുന്ന 108 മണികൾക്ക് പകരം 100 മണികളുള്ള മാല ഉപയോഗിച്ചു. ഓരോ 100 ചുവടുകൾ പൂർത്തിയാകുമ്പോഴും ഒരു മണി നീക്കും. ഇതുവഴി മറ്റുള്ളവർക്ക് സംശയം തോന്നാത്ത വിധത്തിൽ ആയിരക്കണക്കിന് ചുവടുകളുടെ ദൂരം കൃത്യമായി അദ്ദേഹം രേഖപ്പെടുത്തുകയായിരുന്നു.

പ്രാർത്ഥനാ ചക്രത്തിനുള്ളിൽ ഒളിപ്പിച്ചിരുന്നതാകട്ടെ കോമ്പസ്. സർവേ ഉപകരണങ്ങളിൽ ഉപയോഗിച്ചിരുന്ന മെർക്കുറി പോലും കൗറി ഷെല്ലുകൾക്കുള്ളിൽ ഒളിപ്പിച്ചു. ഭൂപ്രദേശത്തെക്കുറിച്ചുള്ള വിവരങ്ങൾ പ്രാർത്ഥനകളെന്ന വ്യാജേന എഴുതി ചുരുളുകളാക്കി പ്രാർത്ഥനാ ചക്രത്തിനുള്ളിൽ സൂക്ഷിച്ചു. രാത്രിയിൽ നക്ഷത്രങ്ങളുടെ സഹായത്തോടെ സെക്സ്റ്റന്റ് (Sextant) ഉപയോഗിച്ച് തന്റെ സ്ഥാനം നിർണയിക്കുകയും ചെയ്തു.

ലാസയുടെ സ്ഥാനം ആദ്യമായി കൃത്യതയോടെ രേഖപ്പെടുത്തി

1866ൽ ബുദ്ധ സന്യാസിയുടെ വേഷത്തിൽ റാവത്ത് ലാസയിലെത്തി. വിദേശികൾക്ക് ഏറെക്കുറെ അപ്രാപ്യമായിരുന്ന നഗരത്തിന്റെ കൃത്യമായ സ്ഥാനം അദ്ദേഹം രേഖപ്പെടുത്തുകയായിരുന്നു. ലാസയുടെ ഉയരവും ആദ്യമായി കണക്കാക്കി. ഇന്ത്യയിലെ ബ്രഹ്മപുത്ര എന്നറിയപ്പെടുന്ന സാങ്‌പോ നദിയുടെ ഗതിയും അദ്ദേഹം പിന്തുടർന്ന് രേഖപ്പെടുത്തി. തുടർന്നുള്ള യാത്രകളിൽ ആയിരത്തോളം കിലോമീറ്ററുകൾ സഞ്ചരിച്ച് ടിബറ്റിലെ വ്യാപാരപാതകൾ, നദികൾ, സ്വർണനിക്ഷേപങ്ങളുള്ള മേഖലകൾ തുടങ്ങിയവയെക്കുറിച്ച് വിവരങ്ങൾ ശേഖരിച്ചു.

ഇന്ത്യയിലെ ആദ്യ ജിയോഗ്രഫിക്കൽ സൊസൈറ്റി പുരസ്‌കാര ജേതാവ്

റാവത്തിന്റെ സംഭാവനകൾക്ക് പിന്നീട് അന്താരാഷ്ട്ര അംഗീകാരവും ലഭിച്ചു. 1877ൽ റോയൽ ജിയോഗ്രഫിക്കൽ സൊസൈറ്റിയുടെ ഗോൾഡ് മെഡലാണ് അദ്ദേഹത്തിന് ലഭിച്ചത്. ഈ പുരസ്‌കാരം നേടുന്ന ആദ്യ ഇന്ത്യക്കാരനായിരുന്നു റാവത്ത്. ജീവിച്ചിരുന്ന മറ്റേതൊരു വ്യക്തിയേക്കാളും ഏഷ്യയുടെ ഭൂപടത്തിലേക്ക് കൂടുതൽ വിവരങ്ങൾ ചേർത്ത വ്യക്തിയാണ് റാവത്തെന്ന് അദ്ദേഹത്തിന്റെ പ്രവർത്തനങ്ങളെ പ്രശംസിച്ച് ഭൂമിശാസ്ത്രജ്ഞനായ ഹെന്റി യൂൾ പറഞ്ഞു. ബ്രിട്ടീഷ് സർക്കാർ അദ്ദേഹത്തിന് രണ്ട് ഗ്രാമങ്ങൾ സമ്മാനിക്കുകയും ചെയ്തു. 1882ലായിരുന്നു റാവത്തിന്റെ അന്ത്യം.