10,000 മീറ്ററിൽ ഇന്ത്യയ്ക്ക് വെള്ളിത്തിളക്കം; ചരിത്രം കുറിച്ച് ഗുൽവീർ സിംഗ്

ഗ്ലാസ്‌ഗോ: കോമൺവെൽത്ത് ഗെയിംസ് പുരുഷന്മാരുടെ 10,000 മീറ്റർ ഓട്ടത്തിൽ വെള്ളി സ്വന്തമാക്കി ഇന്ത്യയുടെ ഗുൽവീർ സിംഗ്. കോമൺവെൽത്ത് ഗെയിംസ് വേദിയിൽ ഈ ഇനത്തിൽ മെഡൽ നേടുന്ന ആദ്യ ഇന്ത്യൻ താരമെന്ന റെക്കോർഡും ഗുൽവീർ സിംഗ് സ്വന്തമാക്കി. 27:49.78 സെക്കൻഡിലാണ് താരം ഫിനിഷ് ലൈൻ തൊട്ടത്. 27:48.93 സെക്കൻഡിൽ ഓട്ടം പൂർത്തിയാക്കിയ ഓസ്ട്രേലിയയുടെ കൈ റോബിൻസൺ സ്വർണം നേടി. ഐൽ ഓഫ് മാൻ സ്വദേശിയായ ഡേവിഡ് മുള്ളാർക്കി വെങ്കല മെഡൽ നേടി.

അതേസമയം, 79 കിലോയിൽ താഴെയുള്ള പുരുഷ വെയ്‌റ്റ് ലിഫ്ടിംഗിൽ ഇന്ത്യയുടെ വല്ലൂരി അജയ ബാബു വെള്ളിനേടി. വെയ്റ്റ് ലിഫ്ടിംഗിൽ ഇന്ത്യയുടെ നാലാമത്തെ വെള്ളിയും ആറാമത്തെ മെഡലുമാണ് കഴിഞ്ഞ രാത്രി വല്ലൂരി നേടിയത്. 21-കാരനായ അജയ ബാബു, സ്നാച്ചിൽ ഗെയിംസ് റെക്കാഡായ 149 കിലോയും ക്ലീൻ ആൻഡ് ജെർക്കിൽ 181 കിലോഗ്രാമും ഉൾപ്പെടെ 330 കിലോ ഉയർത്തിയാണ് വെള്ളിയിലെത്തിയത്. മലേഷ്യയുടെ എറി ഹിദായത്ത് മുഹമ്മദ് ആകെ 331 കിലോ ഉയർത്തി ഗെയിംസ് റെക്കോർഡോടെ സ്വർണം നേടി. ഇംഗ്ലണ്ടിന്റെ ക്രിസ് മുറെയാണ് വെങ്കലം നേടിയത്.

വനിതാ വെയ്റ്റ് ലിഫ്ടിംഗിൽ മീരാഭായ് ചാനു സ്വർണവും ഗ്യാനേശ്വരി യാദവ് വെള്ളിയും ബിന്ധ്യാ റാണി വെങ്കലവും നേടിയപ്പോൾ പുരുഷ വിഭാഗത്തിൽ റിഷി കാന്ത സിംഗ്, രാജ മുത്തുപ്പാണ്ടി, വല്ലൂരി അജയ് ബാബു എന്നിവർ വെള്ളി കരസ്ഥമാക്കി.