പരിക്കേറ്റിട്ടും ക്രീസിൽ, അവസാന പന്തിൽ സിക്സടിച്ച് ജയിപ്പിച്ചു; പാക് താരം തൃശൂരിന്റെ അർജുനെ കണ്ടുപഠിക്കണം

പരിക്ക് വകവയ്‌ക്കാതെ കളത്തിലിറങ്ങി അവസാനപന്തിൽ സിക്‌സർ നേടി ടീമിനെ വിജയിപ്പിച്ച തൃശൂർ ടൈറ്റൻസ് താരം എ കെ അർജുന്റെ പ്രകടനം സോഷ്യൽ മീഡിയയിൽ ചർച്ചയാകുന്നു. കേരള ക്രിക്കറ്റ് ലീഗിലെ കാലിക്കറ്റ് ഗ്ലോബ്‌സ്റ്റാറിനെതിരായ മത്സരത്തിൽ തൃശൂർ ടൈറ്റൻസിനെ വിജയത്തിലെത്തിച്ചത് അർജുന്റെ നിർണായക സിക്‌സറാണ്.

മത്സരത്തിന്റെ അവസാനപന്തിൽ തൃശൂർ ടൈറ്റൻസിന് വിജയിക്കാൻ നാല് റൺസ് വേണമെന്നിരിക്കെയായിരുന്നു അർജുന്റെ കിടിലൻ സിക്‌സർ. ഷാരോൺ എസ് പുറത്തായതോടെയാണ് പരിക്കേറ്റിരുന്ന അർജുൻ ബാറ്റിംഗിനിറങ്ങിയത്. നടക്കാൻ ബുദ്ധിമുട്ടുണ്ടായിരുന്ന അവസ്ഥയിൽ ബാറ്റ് ഊന്നുവടിയാക്കിയാണ് അദ്ദേഹം ക്രീസിലെത്തിയത്. എന്നാൽ, പരിക്കിനെ വകവയ്‌ക്കാതെയായിരുന്നു അദ്ദേഹത്തിന്റെ പ്രകടനം. അർജുന്റെ പോരാട്ട വീര്യത്തെ പ്രശംസിച്ച് നിരവധി ആരാധകരാണ് രംഗത്തെത്തുന്നത്.

ഇംഗ്ലണ്ടിനെതിരായ രണ്ടാം ടെസ്റ്റിൽ പാകിസ്ഥാൻ താരം ഇമാം-ഉൽ-ഹഖിന്റെ പരിക്കിനെക്കുറിച്ചുള്ള ചർച്ചകൾ നടക്കുന്നതിനിടെയാണ് അർജുന്റെ പ്രകടനം കൈയടി നേടുന്നത്. ലോർഡ്‌സിൽ നടന്ന ടെസ്റ്റിന്റെ ആദ്യ ദിനത്തിലാണ് ഇമാമിന്റെ ഇടത് കാലിൽ പരിക്കേറ്റത്. പാകിസ്ഥാൻ ക്രിക്കറ്റ് ബോർഡിന്റെ മെഡിക്കൽ സംഘം പരിശോധനകൾക്ക് ശേഷം പരിക്ക് സ്ഥിരീകരിച്ചു. തുടർന്ന് മത്സരത്തിന്റെ ശേഷിക്കുന്ന ഭാഗത്ത് ഇമാം കളിക്കില്ലെന്ന് അറിയിച്ചു. ഇതോടെ ഒരു താരത്തിന്റെ കുറവോടെയാണ് പാക് ടീം മത്സരം തുടർന്നത്.

മത്സരത്തിന്റെ നാലാം ദിവസം ഇടത് കാലിൽ കട്ടിയായി ടേപ് കെട്ടിയ നിലയിൽ ഇമാം ഗ്രൗണ്ടിലെത്തി. ടെലിവിഷൻ ക്യാമറകൾക്ക് മുന്നിൽ അദ്ദേഹം മുടന്തിക്കൊണ്ട് പരിശീലനം നടത്തുന്നതിന്റെ ദൃശ്യങ്ങൾ പുറത്തുവന്നു. ഇതിനെതിരെ മുൻ ഇംഗ്ലണ്ട് താരം സ്റ്റുവർട്ട് ബ്രോർഡ് വിമർശനവുമായി രംഗത്തെത്തി. പരിക്ക് സംബന്ധിച്ച കാര്യങ്ങൾ ക്യാമറകൾക്ക് മുന്നിൽ കാണിക്കേണ്ട ആവശ്യമില്ലായിരുന്നുവെന്നാണ് ബ്രോഡ് പ്രതികരിച്ചത്.

ഇതിനിടെ, ഇമാം സാധാരണ രീതിയിൽ വിമാനത്താവളത്തിലൂടെ നടക്കുന്ന ദൃശ്യങ്ങളും പുറത്തുവന്നിരുന്നു. ഇതോടെ താരം പരിക്ക് അഭിനയിച്ചതാണെന്ന ആരോപണങ്ങളും സോഷ്യൽ മീഡിയയിൽ ഉയർന്നു. ഇമാമിന്റെ പരിക്കിനെക്കുറിച്ചുള്ള ഇത്തരം വിവാദങ്ങൾക്കിടെയിലാണ് എ കെ അർജുന്റെ പ്രകടനം ആരാധകർക്കിടയിൽ ശ്രദ്ധ നേടുന്നത്. പരിക്കിന്റെ ബുദ്ധിമുട്ടുകൾ മറികടന്ന് ടീമിന് വിജയം സമ്മാനിച്ച അർജുന്റെ അഭിനന്ദനം കൊണ്ട് പൊതിയുകയാണ് ആരാധകർ.