വരുന്ന ഞായറാഴ്ച എല്ലാ ബാങ്കുകളും പ്രവർത്തിക്കണം; ആർബിഐ ഉത്തരവിന് കേന്ദ്രാനുമതി

ന്യൂഡൽഹി: സെപ്തംബർ 27 ഞായറാഴ്ച രാജ്യത്തെ എല്ലാ ബാങ്കുകളും തുറന്ന് പ്രവർത്തിക്കും. ഇതുസംബന്ധിച്ച ഉത്തരവിന് റിസർവ് ബാങ്ക് ഓഫ് ഇന്ത്യയ്ക്ക് (ആർബിഐ) അനുമതി നൽകിയതായി ധനമന്ത്രാലയം അറിയിച്ചു. 28-ാം തീയതിമുതൽ മൂന്ന് ദിവസം ബാങ്ക് ജീവനക്കാർ പണിമുടക്ക് പ്രഖ്യാപിച്ച സാഹചര്യത്തിലാണ് കേന്ദ്രസർക്കാരിന്റെ തീരുമാനം.

സെപ്തംബർ 28 മുതൽ 30 വരെയാണ് ബാങ്ക് ജീവനക്കാരുടെ സംയുക്ത സംഘടനയായ യുണൈറ്റഡ് ഫോറം ഓഫ് ബാങ്ക് യൂണിയൻസ് (യുഎഫ്ബിയു) പണിമുടക്ക് പ്രഖ്യാപിച്ചിരിക്കുന്നത്. ഇതിന് തൊട്ടുമുൻപുള്ള രണ്ടുദിവസങ്ങൾ നാലാം ശനിയാഴ്ചയും ഞായറാഴ്ചയും ആയതിനാൽ അഞ്ച് ദിവസം ബാങ്കിംഗ് സേവനങ്ങൾ തടസപ്പെടും. ഈ സാഹചര്യത്തിലാണ് ഞായറാഴ്ച ബാങ്കുകൾ തുറന്ന് പ്രവർത്തിക്കാൻ കേന്ദ്രസർക്കാർ തീരുമാനിച്ചത്. ഞായറാഴ്ച പൊതുമേഖലാ ബാങ്കുകളും പ്രാദേശിക,​ ഗ്രാമീണ ബാങ്കുകളും സാധാരണനിലയിൽ പ്രവർത്തിക്കുമെന്നും സർക്കാർ പുറത്തിറക്കിയ അറിയിപ്പിൽ വ്യക്തമാക്കുന്നു.

പണിമുടക്ക് കാലയളവിലും മൊബൈൽ ഫോൺ വഴിയുള്ള ഇന്റർ‌നെറ്റ് ബാങ്കിംഗ് സേവനങ്ങൾ ഉപയോഗിക്കാം. ശനിയാഴ്ച പൂർണ അവധി നൽകി ആഴ്ചയിൽ അഞ്ചുദിവസത്തെ ബാങ്കിംഗ് നടപ്പിലാക്കുക എന്നതാണ് യുഎഫ്ബിയുടെ പ്രധാന ആവശ്യം. നേരത്തെ ഡെപ്യൂട്ടി ചീഫ് ലേബർ കമ്മീഷണറുമായി നടത്തിയ ചർച്ചകൾ പരാജയപ്പെട്ടതോടെയാണ് പണിമുടക്ക് പ്രഖ്യാപിച്ചത്. ഉഭയകക്ഷി ചർച്ചകളിലൂടെ പുതുക്കിയ പിഎൽഐ പദ്ധതി പിൻവലിക്കുകയോ ഭേദഗതി ചെയ്യുകയോ ചെയ്യുക, നിലവിലുള്ള പ്രശ്നങ്ങൾ പരിഹരിക്കുക എന്നിവയാണ് മറ്റ് ആവശ്യങ്ങൾ.

എന്നാൽ ബാങ്ക് ജീവനക്കാരുടെ ക്ഷേമത്തിനായി നിരവധി പദ്ധതികൾ നടപ്പിലാക്കുന്നുണ്ടെന്നും അഞ്ചുദിവസത്തെ ബാങ്കിംഗ് വിഷയം സർക്കാരിന്റെ പരിഗണനയിലാണെന്നും ധനമന്ത്രാലയം വ്യക്തമാക്കി.