ഇൻസ്റ്റഗ്രാമും ഫേസ്ബുക്കും ഉപയോഗിക്കുന്നവരാണോ? സോഷ്യൽ മീഡിയ അൽഗോരിതത്തിന്റെ രഹസ്യം അറിയാതെ പോകരുത്

സമൂഹമാദ്ധ്യമങ്ങൾ മനുഷ്യജീവിതത്തിന്റെ ഒരു പ്രധാന ഭാഗമായിക്കഴിഞ്ഞു. ഒരു റീൽ കണ്ടുതീർന്നാൽ അതുമായി സാമ്യമുള്ളത് പിന്നാലെ വരും. ഒരു ഉൽപ്പന്നത്തെക്കുറിച്ച് തിരഞ്ഞാൽ പിന്നാലെ അതിന്റെ പരസ്യങ്ങൾ എത്തും. ഇതെല്ലാം യാദൃച്ഛികമാണോ? സോഷ്യൽ മീഡിയയിലെ അൽഗോരിതങ്ങൾ നമ്മുടെ താൽപര്യങ്ങളെ തിരിച്ചറിയുന്നതെങ്ങനെ? അവ നമ്മുടെ സമയത്തെയും ചിന്തകളെയും തീരുമാനങ്ങളെയും എത്രത്തോളം സ്വാധീനിക്കുന്നു?

രാവിലെ ഉറക്കമുണർന്നാൽ ഉടനെ കയ്യിലെടുക്കുന്ന ഫോൺ രാത്രി ഉറങ്ങുന്നതിനു തൊട്ടുമുമ്പാണ് പലരും താഴെ വയ്ക്കുന്നത്. ഇൻസ്റ്റഗ്രാം, ഫേസ്ബുക്ക്, യൂട്യൂബ് തുടങ്ങിയ പ്ലാറ്റ്ഫോമുകളിൽ ഓരോരുടെയും ന്യൂസ് ഫീഡിൽ വ്യത്യസ്തമായ ഉള്ളടക്കങ്ങളാണ് ലഭിക്കുന്നത്. ഒരാൾക്ക് യാത്രാ വീഡിയോകൾ നിറയുമ്പോൾ മറ്റൊരാൾക്ക് പാചകക്കുറിപ്പുകളോ രാഷ്ട്രീയ ചർച്ചകളോ സിനിമാ വാർത്തകളോ ആയിരിക്കും മുന്നിലെത്തുക. എന്തുകൊണ്ടാണ് ഇങ്ങനെ സംഭവിക്കുന്നത്? ഇതിനു പിന്നിൽ പ്രവർത്തിക്കുന്ന പ്രധാന സംവിധാനങ്ങളിലൊന്നാണ് അൽഗോരിതം.

എന്താണ് സോഷ്യൽ മീഡിയ അൽഗോരിതം?

സോഷ്യൽ മീഡിയയിൽ ഉപയോക്താവിന് ഏതൊക്കെ പോസ്റ്റുകൾ ആദ്യം കാണിക്കണം, ഏത് റീൽ നിർദേശിക്കണം, ഏതൊക്കെ അക്കൗണ്ടുകൾ പരിചയപ്പെടുത്തണം തുടങ്ങിയ കാര്യങ്ങൾ തീരുമാനിക്കുന്ന സംവിധാനമാണ് അൽഗോരിതം. ഉപയോക്താവ് എന്താണ് കാണുന്നത്, ഏതൊക്കെ പോസ്റ്റുകളോട് പ്രതികരിക്കുന്നു, എന്തിലാണ് കൂടുതൽ സമയം ചെലവഴിക്കുന്നത് തുടങ്ങിയ സൂചനകൾ ഉപയോഗിച്ച് ഓരോരുത്തരുടെയും താല്പര്യങ്ങൾക്കനുസരിച്ചുള്ള ഉള്ളടക്കം മുന്നിലെത്തിക്കുകയാണ് അൽഗോരിതത്തിന്റെ ലക്ഷ്യം.

എന്തൊക്കെ ഘടകങ്ങളാണ് അൽഗോരിതത്തെ സ്വാധീനിക്കുന്നത്?

• നിങ്ങൾ കാണുന്ന ഉള്ളടക്കം: ഏത് വിഷയത്തിലുള്ള പോസ്റ്റുകളും വീഡിയോകളുമാണ് നിങ്ങൾ കാണുന്നത്?
• നിങ്ങൾ ചെലവഴിക്കുന്ന സമയം: ഒരു വീഡിയോ എത്രനേരം കാണുന്നു? പൂർണമായി കാണുന്നുണ്ടോ, ഉടൻ മാറ്റുന്നുണ്ടോ?
• നിങ്ങളുടെ ഇടപെടലുകൾ: ലൈക്ക് ചെയ്യുക, കമന്റ് ഇടുക, ഷെയർ ചെയ്യുക, സേവ് ചെയ്യുക തുടങ്ങിയ പ്രവർത്തനങ്ങൾ.
• നിങ്ങൾ ഫോളോ ചെയ്യുന്ന അക്കൗണ്ടുകൾ: ഏതൊക്കെ വ്യക്തികളെയും പേജുകളെയുമാണ് ഫോളോ ചെയ്യുന്നത്?
• നിങ്ങൾ നൽകുന്ന പ്രതികരണങ്ങൾ: താൽപര്യമില്ലാത്ത പോസ്റ്റുകൾ പെട്ടെന്ന് മാറ്റുകയോ, സമാനമായ ഉള്ളടക്കം വേണ്ടെന്ന് അറിയിക്കുകയോ ചെയ്യുന്നുണ്ടോ?

ഇത്തരം കാര്യങ്ങളെല്ലാം പരിശോധിച്ച് ഒരാൾക്ക് താൽപര്യമുണ്ടാകാൻ സാദ്ധ്യതയുള്ള ഉള്ളടക്കം ഏതാണെന്ന് അൽഗോരിതം കണക്കുകൂട്ടുന്നു.

അൽഗോരിതവും സമയവും

സോഷ്യൽ മീഡിയ തുറന്ന് ഒരു വീഡിയോ മാത്രം കാണാനിരിക്കുന്ന ഒരാൾ അരമണിക്കൂറിനുശേഷവും സ്ക്രീനിൽ തുടരുന്ന സാഹചര്യം ഉണ്ടാകാറുണ്ട്. തുടർച്ചയായി താല്പര്യമുള്ള ഉള്ളടക്കം ലഭിക്കുന്നതാണ് ഇതിന് കാരണം. ഉപയോക്താവിന് താൽപര്യമുള്ള ഉള്ളടക്കം വേഗത്തിൽ കണ്ടെത്താൻ അൽഗോരിതം സഹായിക്കും. എന്നാൽ സോഷ്യൽ മീഡിയയിൽ ചെലവഴിക്കുന്ന സമയം നീണ്ടുപോകാൻ ഇത് കാരണമായേക്കും. സോഷ്യൽ മീഡിയയുടെ അമിത ഉപയോഗവും ഉറക്കക്കുറവും ശ്രദ്ധക്കുറവും തമ്മിലുള്ള ബന്ധത്തെക്കുറിച്ച് ഗവേഷണങ്ങൾ പുരോഗമിക്കുകയാണ്.

നമ്മുടെ ചിന്തകളെയും കാഴ്ചപ്പാടുകളെയും ഇത് സ്വാധീനിക്കുമോ?

ഒരു വ്യക്തി സ്ഥിരമായി ഒരേ വിഷയത്തിലുള്ള വീഡിയോകൾ മാത്രം കണ്ടുകഴി‌ഞ്ഞാൽ കാലക്രമേണ ആ വിഷയം സമൂഹത്തിൽ ഏറ്റവും പ്രധാനപ്പെട്ടതാണെന്നോ എല്ലാവരും അംഗീകരിക്കുന്നുണ്ടെന്നോ തോന്നാൻ സാദ്ധ്യതയുണ്ട്. ഇതിന് കാരണം അൽഗോരിതം മാത്രം ആയിരിക്കണമെന്നില്ല. ഉപയോക്താവിന്റെ സ്വന്തം താൽപര്യങ്ങളും പിന്തുടരുന്ന അക്കൗണ്ടുകളും സുഹൃത്തുക്കളുടെ ഇടപെടലുകളും ഇതിൽ പങ്കുവഹിക്കുന്നു.

എന്നിരുന്നാലും, സമാനമായ കാഴ്ചപ്പാടുകളുള്ള ഉള്ളടക്കം ആവർത്തിച്ച് കാണുന്നത് വ്യത്യസ്ത അഭിപ്രായങ്ങളെയും വിവരങ്ങളെയും പരിചയപ്പെടാനുള്ള അവസരം കുറയ്ക്കാം. ചില സാഹചര്യങ്ങളിൽ ഇത് എക്കോ ചേംബർ എന്നറിയപ്പെടുന്ന അവസ്ഥയ്ക്ക് കാരണമാകാം.

സ്വകാര്യത എത്രത്തോളം സുരക്ഷിതമാണ്?

സോഷ്യൽ മീഡിയ ആപ്ളിക്കേഷനുകളിൽ നൽകുന്ന അനുമതികൾ എപ്പോഴും പരിശോധിച്ചതിന് ശേഷം മാത്രം നൽകുക. ആവശ്യമില്ലാത്ത അനുമതികൾ ഒഴിവാക്കുന്നതാണ് നല്ലത്. അക്കൗണ്ടിന്റെ സ്വകാര്യതാ രീതികൾ മനസിലാക്കിയതിന് ശേഷം മാത്രം അനുമതി നൽകുക. ആപ്പുകൾ പൂർണമായി ഉപേക്ഷിക്കുന്നത് പരിഹാരമാർഗമല്ല. ഉപയോഗസമയത്തിന് പരിധി നിശ്ചയിക്കുക, നിർദേശങ്ങളും അറിയിപ്പുകളും നന്നായി മനസിലാക്കുക, ഇടവേളകളെടുക്കുക തുടങ്ങിയ മാർഗങ്ങൾ സഹായകമാകും.

ഓരോ തവണ സോഷ്യൽ മീഡിയ ഉപയോഗിക്കുമ്പോഴും ചില കാര്യങ്ങൾ പ്രത്യേകം ശ്രദ്ധിക്കേണ്ടതുണ്ട്. നിങ്ങൾ കാണുന്ന ഓരോ വീഡിയോയും സ്വയം തിരഞ്ഞെടുത്തതാണോ, അതോ ഇഷ്ടപ്പെടാൻ സാദ്ധ്യതയുണ്ടെന്ന് ഒരു സംവിധാനം കണക്കുകൂട്ടി മുന്നിലെത്തിച്ചതാണോയെന്ന് ഉറപ്പുവരുത്തുക.