ഓപ്പറേഷൻ തെളിമ: ജില്ലയിൽ വ്യാപക പരിശോധന; നാല് സ്ഥാപനങ്ങൾ പൂട്ടി

​കൊല്ലം: സംസ്ഥാന വ്യാപകമായി നടത്തുന്ന 'ഓപ്പറേഷൻ തെളിമ II' ന്റെ ഭാഗമായി ജില്ലയിൽ വ്യാപക പരിശോധന. ഇന്നലെ രാവിലെ 5 മുതൽ 10.30 വരെ കൊല്ലം ഫുഡ് സേഫ്ടി അസിസ്റ്റന്റ് കമ്മിഷണർ എ.സക്കീർ ഹുസൈന്റെ നേതൃത്വത്തിലായിരുന്നു പരിശോധന.

​ഭക്ഷ്യസുരക്ഷാ മാനദണ്ഡങ്ങൾ ലംഘിച്ചും ലൈസൻസ് ഇല്ലാതെയും പ്രവർത്തിച്ചിരുന്ന നാല് സ്ഥാപനങ്ങൾ പൂട്ടിച്ചു. ഇതിൽ ഒരു സ്ഥാപനത്തിന് ലൈസൻസ് ഉണ്ടായിരുന്നെങ്കിലും രജിസ്ട്രേഷൻ റദ്ദാക്കിയിട്ടുണ്ട്. മറ്റ് മൂന്ന് സ്ഥാപനങ്ങൾക്ക് ലൈസൻസ് ഉണ്ടായിരുന്നില്ല.​ അതീവ വൃത്തിഹീനമായ സാഹചര്യങ്ങളിൽ പലഹാരങ്ങളും മറ്റും നിർമ്മിക്കുന്നതും, പാചകത്തിനായി ഉപയോഗിച്ച എണ്ണ വീണ്ടും വീണ്ടും ഉപയോഗിക്കുന്നതും ഉൾപ്പടെ ഗുരുതര ക്രമക്കേടുകളാണ് കണ്ടെത്തിയത്.

എട്ട് സ്ഥാപനങ്ങൾക്കെതിരെ പിഴ ഈടാക്കാനുള്ള നടപടികൾ ആരംഭിച്ചു. ചെറിയ വീഴ്ചകൾ കണ്ടെത്തിയ രണ്ട് സ്ഥാപനങ്ങൾക്ക് നോട്ടീസ് നൽകി.

​കൊല്ലം അർബൻ സർക്കിൾ, കൊല്ലം ഇരവിപുരം സർക്കിൾ, കോർപ്പറേഷൻ ഏരിയകൾ കേന്ദ്രീകരിച്ച് നാല് സ്ക്വാഡുകൾ, കൊട്ടാരക്കര-പുനലൂർ ഏരിയ കേന്ദ്രീകരിച്ച് ഒരു സ്ക്വാഡ് ഉൾപ്പടെ അഞ്ച് സ്ക്വാഡുകളാണ് പരിശോധനയിൽ പങ്കെടുത്തത്.

​ഭക്ഷ്യവസ്തുക്കൾ നശിപ്പിച്ചു

ചായപ്പൊടിയുടെ സാമ്പിളുകൾ ശേഖരിച്ചതിനൊപ്പം വൃത്തിഹീനമായ സാഹചര്യത്തിൽ സൂക്ഷിച്ചിരുന്നതും തലേദിവസം തയ്യാറാക്കി നിലത്ത് ചാക്കുകളിൽ സൂക്ഷിച്ചിരുന്നതുമായ 25 കിലോയോളം വരുന്ന സ്നാക്സുകൾ, മധുര സേവ, കപ്പലണ്ടി തുടങ്ങിയവ പൂർണമായി നശിപ്പിച്ചു.