യുവാവിന് ദാരുണാന്ത്യം പൊലീസ് ക്രൂരതയിൽ?​ സംഭവം കുണ്ടറയിൽ,​ വിലപിച്ച് മകൾ

​കൊല്ലം: അയൽവാസി​യായ 13കാരനെ കാണാനി​ല്ലെന്ന പരാതി​യെ തുടർന്ന് കുണ്ടറയിൽ പൊലീസ് ചോദ്യം ചെയ്തു വിട്ടയച്ച യുവാവ് മരിച്ചത് കസ്റ്റഡി മർദ്ദനം കൊണ്ടാണെന്ന് കുടുംബം. പെരുമ്പുഴ സൊസൈറ്റിമുക്ക് കുളത്തിൻകര കടയിൽ വീട്ടിൽ സിയാദാണ് (36) തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ മരി​ച്ചത്.

പൊലീസ് ജീപ്പിലും സ്റ്റേഷനിലും വച്ച് മർദ്ദി​ച്ചതായി​ സി​യാദ് വെളിപ്പെടുത്തിയിരുന്നു. മർദ്ദനത്തിൽ വാരിയെല്ല് പൊട്ടിയെന്നും നട്ടെല്ലിന് ക്ഷതം സംഭവിച്ചതായും പരാതി​യി​ൽ പറയുന്നു.രോഗിയാണെന്ന് പറഞ്ഞിട്ടും പൊലീസ് ചെവിക്കൊണ്ടില്ല. ജൂൺ 16ന് രാത്രിയി​ലാണ് കസ്റ്റഡിയിലെടുത്തത്. വിദ്യാർത്ഥിയെ പിന്നീട് കണ്ടെത്തുകയും സിയാദിന് ബന്ധമില്ലെന്ന് വ്യക്തമാവുകയും ചെയ്തതോടെ 17ന് പുലർച്ചെ വിട്ടയച്ചു.

ആഭ്യന്തരമന്ത്രി രമേശ് ചെന്നിത്തല ഡി.ജി.പിയോട് റിപ്പോർട്ട് തേടി. സംഭവം ക്രൈംബ്രാഞ്ച് അന്വേഷിക്കും. മന്ത്രി പി.സി.വിഷ്ണുനാഥ് സിയാദിന്റെ വീട് സന്ദർശിച്ചു. മുഴുവൻ കുറ്റവാളികളെയും നിയമത്തിനു മുന്നിലെത്തിക്കണമെന്ന് പ്രതിപക്ഷ നേതാവ് പിണറായി വിജയൻ ഫേസ്ബുക്ക് പോസ്റ്റിലൂടെ ആവശ്യപ്പെട്ടു.

പൊലീസുകാരനോട് പറഞ്ഞത്

സി​യാദി​നെ കസ്റ്റഡിയിലെടുക്കാൻ എത്തിയ പൊലീസ് സംഘത്തി​ലുണ്ടായി​രുന്ന സി​വി​ൽ പൊലീസ് ഓഫീസർ ശ്രീജി​ത്തുമായി​ സി​യാദി​ന്റെ മകൾ കരഞ്ഞുകൊണ്ട് സംസാരി​ക്കുന്ന ഫോൺ​ കോൾ പുറത്തുവന്നു. 'എന്റെ പപ്പ പോയി. സാർ നട്ടെല്ലിന് ഇടിച്ചില്ലേ? സാറിനോട് പറഞ്ഞതല്ലേ പപ്പയ്ക്ക് വയ്യാത്തതാണെന്ന്'- എന്നായിരുന്നു മകളുടെ വിലാപം.

മർദ്ദി​ച്ചി​ല്ലെന്ന് പൊലീസ്

മർദ്ദിച്ചിട്ടില്ലെന്നും പോസ്റ്റ്‌മോർട്ടത്തിന്റെ പ്രാഥമിക നി​ഗമന പ്രകാരം സിയാദിന് ഹെപ്പറ്റൈറ്റിസ് ബി ഉൾപ്പെടെ ആരോഗ്യപ്രശ്നങ്ങൾ ഉണ്ടായിരുന്നുവെന്നും അതാണ് മരണത്തിലേക്ക് നയിച്ചതെന്നും പൊലീസ് പറയുന്നു. അന്തിമ റിപ്പോർട്ട് ലഭി​ച്ചാൽ മാത്രമേ മരണകാരണം സ്ഥിരീകരിക്കാൻ സാധിക്കൂ.