'ചൊറിയൻപുഴു യുദ്ധം' അരങ്ങിൽ

കണ്ണൂർ: വൈക്കം മുഹമ്മദ് ബഷീറിന്റെ വിഖ്യാത കഥാപാത്രങ്ങളെ അണിനിരത്തി തിരുവനന്തപുരം സാഹിതി തിയറ്റേഴ്സ് അവതരിപ്പിച്ച 'ചൊറിയൻപുഴു യുദ്ധം' കാണികൾക്ക് വേറിട്ട നാടകാനുഭവമായി. ടൗൺ സ്‌ക്വയറിൽ സംസ്‌കാര സാഹിതി കണ്ണൂർ ജില്ലാ കമ്മിറ്റിയുടെ ആഭിമുഖ്യത്തിലായിരുന്നു നാടകാവതരണം. ബഷീറിന്റെ 'സ്ഥലത്തെ പ്രധാന ദിവ്യൻ' എന്ന നോവലിനെ ആസ്പദമാക്കി, വർത്തമാനകാല സാമൂഹിക പശ്ചാത്തലം കൂടി ഉൾപ്പെടുത്തിയാണ് നാടകം ഒരുക്കിയത്. ഹേമന്ദ് കുമാർ രചനയും രാജേഷ് ഇരുളം സംവിധാനവും നിർവഹിച്ചു. നാടകാവതരണത്തിനു മുന്നോടിയായി നടന്ന സാംസ്‌കാരിക സമ്മേളനം കെ. സുധാകരൻ എം.പി ഉദ്ഘാടനം ചെയ്തു. സി.ആർ മഹേഷ് എം.എൽ.എ അദ്ധ്യക്ഷത വഹിച്ചു. സാഹിത്യകാരൻ ടി. പദ്മനാഭൻ മുഖ്യപ്രഭാഷണം നടത്തി. ടി.ഒ മോഹനൻ എം.എൽ.എ, ഡി.സി.സി പ്രസിഡന്റ് മാർട്ടിൻ ജോർജ്, കെ. പ്രമോദ്, എം. പ്രദീപ് കുമാർ, ശ്രീജിത്ത് മട്ടന്നൂർ പ്രസംഗിച്ചു.