കോഴിക്കോട്ട് നിയന്ത്രണം വിട്ട കാർ മതിലിലിടിച്ച് തീപിടിച്ചു; ചേവായൂർ സ്വദേശി മരിച്ചു

കോഴിക്കോട്: നിയന്ത്രണം വിട്ട കാർ മതിലിലിടിച്ചുണ്ടായ തീപിടിത്തത്തിൽ ഒരാൾ മരിച്ചു. ചേവായൂർ സ്വദേശിയായ സുധാകരനാണ് മരിച്ചത്. കോഴിക്കോട് ചേവായൂരിന് സമീപം മഠത്തിൽ മുക്കിൽ പുലർച്ചെ നാലരയോടെയായിരുന്നു അപകടം.

കുത്തനെയുള്ള ഇറക്കത്തിൽ നിയന്ത്രണംവിട്ട കാർ മതിലിൽ ഇടിച്ചതിനുപിന്നാലെ തീപടരാൻ തുടങ്ങി. ഡോർ ലോക്കായിപ്പോയതിനാൽ സുധാകരൻ കാറിൽ കുടുങ്ങുകയായിരുന്നു. മെഡിക്കൽ കോളേജ് ഭാഗത്തുനിന്ന് ഫയർഫോഴ്‌സെത്തി തീയണച്ചെങ്കിലും കാറിൽനിന്ന് മൃതദേഹം മാറ്റാൻ കഴിഞ്ഞിട്ടില്ല. കാ‌ർ വെട്ടിപ്പൊളിച്ച് മൃതദേഹം പുറത്തെടുക്കാനുള്ള ശ്രമത്തിലാണ് ഉദ്യോഗസ്ഥർ.

ഫോറൻസിക് പരിശോധനകൾക്ക് ശേഷം മൃതദേഹം മെഡിക്കൽ കോളേജിലേക്ക് മാറ്റുമെന്നും വിശദമായ അന്വേഷണം ആരംഭിക്കുമെന്നും ഉദ്യോഗസ്ഥർ പറഞ്ഞു. സംഭവസ്ഥലത്ത് അപകടങ്ങൾ പതിവാണെന്ന് നാട്ടുകാരും പരാതിപ്പെടുന്നു.