മലനാട് യൂണിയനിൽ ഭക്തിനിർഭരമായ ചടങ്ങുകൾ

കട്ടപ്പന: ഗുരുദേവന്റെ 99-ാമത് സമധിദിനം ഭക്തിനിർഭരമായ ചടങ്ങുകളോടെ മലനാട് യൂണിയനിലെ 40 ശാഖകളിലും നടത്താൻ ഒരുക്കങ്ങൾ പൂർത്തിയായി. ഗുരുദേവ ക്ഷേത്രങ്ങളിലും പ്രത്യേകം തയ്യാറാക്കിയ സമാധിദിനാചരണ ആശ്രമ സമാനമായ ഇടങ്ങളിലും പൂജയും ആരാധനയും ഉണ്ടാകും. മഹാസമാധിദിനത്തിന്റെ മഹത്വം അറിയിച്ചുകൊണ്ടുള്ള പ്രഭാഷണങ്ങൾ, സമൂഹപ്രാർത്ഥന, അന്നദാനം എന്നിവ നടക്കും. ശാഖകളിലെ ബഹുഭൂരിപക്ഷം ജനങ്ങളും പഞ്ചശുദ്ധിയാചരണത്തോടെയുള്ള ഉപവാസമനുഷ്ടിച്ചുകൊണ്ടാണ് മഹാസമാധി ദിനാചരണങ്ങളിൽ പങ്കുകൊള്ളുക. ഗുരുദേവന്റെ അതിവിശിഷ്ടങ്ങളായ കൃതികളുടെ വായനയും അർത്ഥവിചാരവും ചടങ്ങുകളിൽ പ്രധാനപ്പെട്ടവയാണ്. നാളെ രാവിലെ ആറിന് ക്ഷേത്രങ്ങളിൽ മഹാഗുരുപൂജയോടെ ആചരണപരിപാടികൾക്ക് തുടക്കമാകും. വൈകിട്ട് 3.30ന് ദൈവദശക പ്രാർത്ഥനയോടെ ചടങ്ങുകൾക്ക് സമാപനമാകും. തുടർന്ന് അന്നദാനവും നടക്കും. മലനാട് യൂണിയനിലെ 40 ശാഖകളിലും നടക്കുന്ന ചടങ്ങുകളിൽ യൂണിയൻ നേതാക്കൾ പങ്കെടുക്കുമെന്നും യൂണിയൻ പ്രസിഡന്റ് ബിജു മാധവൻ, സെക്രട്ടറി വിനോദ് ഉത്തമൻ എന്നിവർ അറിയിച്ചു.